Hala, adin, tamaina, espezie mota edota leku zein gertakari jakin bati loturiko arrazoiak direla eta aukeraturiko zuhaitzak biltzen dira. Horrenbestez, ale bakoitzaren inguruko informazio zabala eskaintzearekin batera, zuhaitzaren argazki orokorra eta adierazgarriak diren irudiak ere jasotzen dira.
Zuhaitz bakoitzaren inguruko fitxez gain, ale guztien kokapena islatzeko planoa ere barneratu da, herriko gune ezberdinen “zoomak” erabili direlarik. Katalogoa borobiltzeko, gaztetxoei zuzenduriko fitxa didaktikoa txertatu da, Basauriko zuhaitzak ezagutarazi eta haien beharraren inguruko sentsibilizazioan sakontzeko helburuarekin.
Horrekin batera, zuhaitz esanguratsuak seinaleztatu dira. Hala, espezieen izendapen ezberdinak jasotzearekin batera, kasuan kasuko hosto adierazgarrien ilustrazioak ere txertatu dira. Horri esker, Basauriko herritarren zein bisitarien esperientzia hobea izango da, ikusgai dauden zuhaitz espezieak ezagutzearekin batera, naturarekiko lotura sendotuko baitute.